ڈاکٹر عاشق حسین بٹالوی (پیدائش: 1903ء- وفات: 17 جولائی 1989ء) پاکستان کے نامور مورخ، افسانہ نگار اور تحریک پاکستان کے کارکن تھے۔

حالات زندگی

ڈاکٹرعاشق حسین بٹالوی 1903ء میں بٹالہ، ضلع گرداسپور، برطانوی ہندوستان میں پیدا ہوئے۔ انھوں نے جامعہ لندن کے اسکول آف اورینٹل اینڈ افریقن اسٹڈیز سے پی ایچ ڈی کی ڈگری حاصل کی۔ ان کی تصانیف میں ہماری قومی جدوجہد، اقبال کے آخری دو سال، چند یادیں چند تاثرات، ‘تاریخ اور افسانہ، راہ گذر اور شاخسار کے نام شامل ہیں۔

تصانیف

• اقبال کے آخری دو سال
• اقبال اور تحریک پاکستان
• چند یادیں چند تاثرات(آپ بیتی)
• ہماری قومی جدوجہد (تاریخ)
• سوزِناتمام (افسانے)
• رہگذر (افسانے)
• شاخسار (افسانے)
• مجموعہ عاشق حسین بٹالوی (کلیات / تاریخ اور افسانہ)

اقبالیات

عاشق حسین بٹالوی ۔ نامور مؤرخ‘ افسانہ نگار اور تحریکِ پاکستان کے کارکن۔ آپ نے کئی کتب تحریر کیں جن میں اقبالیات پر آپ کی کتاب ’اقبال کے آخری دو سال‘ مقبولِ عام ہے۔ بقول عاشق حسین بٹالوی اس کتاب کے لکھنے کی ترغیب چراغ حسن حسرت نے دلائی تھی کیونکہ اقبالیات کے بہت سے موضوعات پر کام ہو چکا تھا اور یہ زمانہ ایسا تھا جب علامہ اقبال آل انڈیا مسلم لیگ پنجاب کے صدر تھے اور خود عاشق حسین بٹالوی بھی مسلم لیگ کا حصہ تھے۔

اعزازات

1967ء – صدارتی تمغا برائے حسن کارکردگی حکومت پاکستان

وفات

ڈاکٹر عاشق حسین بٹالوی 17 جولائی 1989ء کو لندن، برطانیہ میں وفات پاگئے۔ وہ لاہور میں ماڈل ٹاؤن کے قبرستان میں سپردِ خاک ہیں۔