رضیہ بٹ (پیدائش: 19 مئی 1924ء— 4 اکتوبر 2012ء) پاکستان سے تعلق رکھنے والی اردو کی مشہور ناول نگار اور کہانی نویس تھیں۔ انھیں پاکستانی خواتین میں سب سے زیادہ پڑھی جانے والی ناول نگار ہونے کا درجہ حاصل ہے۔ ان کے ناول اور کہانیوں پر متعدد ٹی وی ڈرامے اور فلمیں بن چکی ہیں۔

ابتدائی حالات

رضیہ بٹ 19 مئی 1924ء کو وزیر آباد، پنجاب میں پیدا ہوئیں۔ انھوں نے اپنی زندگی کا بیشتر وقت پشاور میں گزارا۔ دسویں جماعت میں اُردو میں 100 فیصد نمبر حاصل کیے، جس پر اُستاد خاتون نے کہا کہ اگر میرے بس میں ہوتا تو ایک سو نمبروں میں سے ایک سو پچاس نمبر دیتی۔

ادبی سفر

1940ء کے آس پاس ان کا پہلا کام ادبی جریدے میں چھپا. اس وقت رضیہ بٹ کی عمر 20 سال سے بھی کم تھی۔ اپنی پہلی کہانی کو بعد میں انھوں نے ناول ‘نائلہ’ کی شکل میں ڈھال کر شائع کروایا۔ 1946ء میں شادی کے بعد چند سال وہ ادبی سرگرمیوں سے دور رہیں. 1950ء میں انھوں نے دوبارہ لکھنا شروع کیا۔ قیام پاکستان کے بعد ان کا ناول ‘بانو’ منظرِ عام پر آیا تو اس نے مقبولیت کے سارے ریکارڈ توڑ دیے۔ برسوں بعد اس ناول کو ٹیلی ویژن پر پیش کیا گیا۔ رضیہ بٹ نے ناولوں کی تعداد 51 سے زیادہ ہے اور 350 مختصر کہانیاں اس کے علاوہ ہیں۔ وہ ریڈیو ڈرامے بھی لکھتی تھیں۔ ان کے کچھ ناول ٹی وی اور فلموں کی زینت بھی بنے. صاعقہ اور نائلہ ، کو بڑی اسکرین اور نورینہ، ناجیہ، صائقہ اور بانو کو ٹی وی ڈراما سیریل کے لیے ڈھالا گیا۔ رضیہ بٹ کا کام کئی نسلوں کا پسندیدہ رہا. انھوں نے اپنی سوانح حیات ‘بچھڑے لمحے’ بھی لکھی۔

کارہائے نمایاں

رضیہ بٹ کے ناولوں پر کئی فلمیں بن چکیں جنھیں مقبولیت بھی ملی۔ فکشن نگاری میں انھیں خاص مقام حاصل ہے۔ رضیہ بٹ کے ناولوں پر ایک سرسری نگاہ ڈالنے سے بھی اندازہ ہوجاتا ہے کہ وہ پاکستانی معاشرے میں عورت کے کردار کو مرکزی اہمیت دیتی ہیں۔ مثلاً ان کے ناول نائلہ، صاعقہ، انیلہ، شبو، بانو، ثمینہ، ناجیہ، شائنہ، سبین، رابی اور بینا سب کے سب عورت کے مرکزی کردار کے گرد بُنے گئے ہیں۔ مغربی پاکستان کی پہلی رنگین فلم نائلہ انھی کے ایک ناول پر مبنی تھی۔

تصانیف

ناول

• آدھی کہانی
• آگ
• آئینہ
• انیلہ
• بانو
• بینا
• چاہت
• ڈارلنگ
• فاصلے
• میں کون ہوں؟
• نائلہ
• ناسور
• نورینہ
• ریتا
• روپ
• سبین
• صائقہ
• ثمینہ
• سوانح
• زندگی
• آمنہ
• مہرو
• زری

ناول پر مبنی ڈرامے

• اماں (احمد نوید نے پی ٹی وی کے لیے ڈرامائی پیشکش کی)
• بانو (ہم ٹی وی پر داستان کے نام سے 2010 میں ڈراما بنا)
• نائلہ
• نورینہ (1995 میں پی ٹی وی ڈراما)
• صاعقہ (ہم ٹی وی پر 209 میں ڈراما)

ناول پر مبنی فلمیں

• نائلہ (1965)
• صاعقہ (1968)
• انیلہ (1969)
• نورین (1970)
• محبت (1972)
• خلش (1972)
• پیاسا (1973)
• محبت ہو تو ایسی (1989)
• گلابو (2008)

وفات

اکتوبر، 2012ء کو ان کا انتقال لاہور میں طویل بیماری کے بعد ہوا۔